काठमाडौं । नेपालकाे ताप्लेजुङ र भारतको सिक्किमबीचको सीमाक्षेत्रमा संयुक्त अनुगमन, गस्ती तथा सीमा स्तम्भ मर्मत कार्य सम्पन्न भएको छ।
प्रमुख जिल्ला अधिकारी शिवराज सेढाईंको नेतृत्वमा नेपाली सशस्त्र प्रहरी बल र भारतीय सशस्त्र सीमा बल (एसएसबी) सम्मिलित टोलीले सिदिङवा–१ र सिरीजंघा–८ अन्तर्गत पर्ने तिम्बुङपोखरी तथा भारतको ग्याल्सिङ जिल्लास्थित लामपोखरी क्षेत्रमा स्थलगत निरीक्षण गरेको हो।
सशस्त्र प्रहरी नायब उपरीक्षक प्रमोद प्रकाश पाठकको नेतृत्वमा सम्पन्न गस्तीका क्रममा जीर्ण सीमा स्तम्भ मर्मत र दशगजा क्षेत्रमा सरसफाइ अभियान पनि सञ्चालन गरिएको थियो।
सेढाईंका अनुसार सीमा सुरक्षामा यस्ता संयुक्त सहकार्यले आपसी विश्वास र पारदर्शीता बढाउँदै दुवै देशबीचको सम्बन्धलाई अझ मजबुत बनाउनेछ। स्थानीय तह र सुरक्षा निकायहरूले यसलाई दिगो सीमा सुरक्षा संयन्त्रतर्फको महत्त्वपूर्ण कदमका रूपमा लिएका छन्।
