बारा । बाराको जितपुरसिमरा उपमहानगरपालिका-२ पानी ट्याङकी नजिकै आइतबार दिउँसो दुइवटा मोटरसाइकल एक-आपसमा ठोक्किँदा दुई जनाको मृत्यु भएको छ ।
इलाका प्रहरी कार्यालय सिमराका अनुसार दिउँसो करिब १ बजे सिमरा-पथलैया सडक खण्डमा सिमराबाट पथलैया तर्फ जाँदै गरेको बा ९० प ६७९४ नम्बरको मोटरसाइकल र विपरीत दिशाबाट आउँदै गरेको बा प्र ०६-००३ प १७५३ नम्बरको मोटरसाइकल ठोक्किँदा दुर्घटना भएको हो ।
दुर्घटनामा गम्भीर घाइते भएका रौतहटको गुजरा नगरपालिका-७ परसवाका २५ वर्षीय रोशन चौधरी र सप्तरी बसवलपुर नगरपालिका-७ का २८ वर्षीय महेश पण्डितको उपचारको क्रममा मृत्यु भएको प्रहरीले जनाएको छ ।
चौधरीको प्रादेशिक अस्पताल कलैयामा उपचारका क्रममा दिउँसो ३ बजे र पण्डितको परवानिपुर स्थित एल.एस. न्युरो अस्पतालमा दिउँसो २ः४५ बजे ज्यान गएको हो । त्यस्तै सोही मोटरसाइकलमा सवार रौतहटका ३४ वर्षीय भुपेन्द्र चौधरी घाइते भएका छन् ।
उनको दाहिने हात र बायाँ खुट्टा भाँचिएको र उपचार परवानिपुर स्थित एल.एस. न्युरो अस्पतालमा भइरहेको प्रहरीले जनाएको छ ।
