राैतहट । मोबाइल चोरीको आरोपमा कुटपिटबाट गम्भीर घाइते भएका रौतहटका एक युवाको मृत्यु भएको छ।
कटहरिया नगरपालिका-४ बहादुरपुरका २८ वर्षीय नसिब बैठाको ११ भदौमा मृत्यु भएको हो । गत साउन १६ गते कटहरिया बजारको एक खाजा पसलमा गर्भुदयाल सर्भङ्गले आफ्नो मोबाइल चोरी भएको आरोप लगाएर अन्य केही युवासमेत मिलेर नसिबलाई कुटपिट गरेका थिए ।
यो समूहले फेरि घरमै आएर नसिबलाई आँखामा पट्टी बाँधेर रूखमा डोरीले उल्टो झुन्ड्याएर साइकलको निर्घात कुटपिट गरेको परिवारको दाबी छ । घटनापछि प्रहरीले नसिबलाई पक्राउ गरी इलाका प्रहरी कार्यालय कटहरिया पुर्याएको थियो।
प्रहरीको छानबिनमा नसिब निर्दोष देखिएपछि छोडिएको परिवारले बताएको छ। तर कुटपिटबाट गम्भीर चोट लागेका नसिबको स्वास्थ्य बिग्रँदै गएपछि परिवारले उपचारका लागि वीरगन्जस्थित ‘स्पर्स’ अस्पताल लगेको थियो ।
उपचारको क्रममा नसिबको मृत्यु भएको र घटनामा संग्लन गर्भुदयाललाई पक्राउ गरिएको इलाका प्रहरी कार्यालय गरुडाका प्रमुख राजन कार्कीले बताउनुभयो।
