काठमाडौं । उमा महेश्वरसहित दुबोको पूजा गरेर सुदूरपश्चिम र कर्णाली प्रदेशवासीले आइतबार गौरा पर्व मनाउँदैछन् ।
यो पर्व चान्द्रमासअनुसार भाद्र महिनामा मनाइन्छ । चान्द्रमासअनुसार भाद्र महिनाअगावै अगस्त्य ऋषिको उदय हुने वर्ष भने श्रावण शुक्ल अष्टमीकै दिन मनाउनुपर्ने शास्त्रीय विधान रहेको नेपाल पञ्चांग निर्णायक विकास समितिले जनाएको छ ।
शुक्ल पक्षमा मनाइने गौरालाई उज्याली र कृष्ण पक्षमा मनाइने गौरालाई अँध्यारी भन्ने गरिन्छ । यसैले यस वर्षको गौरालाई उज्याली भनिन्छ । पहिलोपटक व्रत बस्नेले भने शुक्ल पक्ष अर्थात् उज्याली गौराबाटै सुरु गर्नुपर्ने व्रत विधान छ ।
जसअनुसार यस वर्ष नयाँ व्रतालुले व्रत गर्न सक्छन् । गौरालाई सुदूरपश्चिम र कर्णाली क्षेत्रमा ऐतिहासिक मौलिक पर्वका रूपमा लिने गरेका छन् । गौरा पूजा गर्न पाँच वनस्पति कुश, काँस, सामा, तीतेपाती र अपामार्ग तथा कतै तिलको बिरुवा पनि राखेर देवीको आकार बनाउने गरिन्छ ।
यसरी बनाइएको देवीलाई भाद्र कृष्ण अष्टमीका दिन गाउँको सफा घरमा भित्र्याएर व्रतालुले निराहार बसी पूजा गर्ने परम्परा रहेको छ । सन्तानको आयु तथा स्वास्थ्य राम्रो होस् भन्ने कामनाले पनि गौरा पर्व मनाइन्छ ।
काठमाडौंको टुँडिखेलमा पनि यस दिन देउडा गीत र नृत्य गरी सूदुरपश्चिम एवं कर्णाली प्रदेशवासीले मनोरञ्जन गर्ने गरेका छन् ।
