सप्तरी । सप्तरीको महादेवा गाउँपालिका-१ सोनरा टोलमा दाइजोको निहुँमा एक नवविवाहित महिलाको शंकास्पद मृत्यु भएको छ।
मृतकका माइती पक्षले दाइजोको निहुँमा श्रीमान र ससुराले कुटपिट गरेर हत्या गरेको आरोप लगाउँदै जिल्ला प्रहरी कार्यालय सप्तरीमा उजुरी दिएका छन्।
२१ वर्षीया दीपाकुमारी यादवलाई बिरामी भएको भन्दै शनिबार सदरमुकाम राजविराजस्थित गजेन्द्रनारायण सिंह अस्पताल लगिएको थियो। तर, चिकित्सकहरूले दीपालाई मृत घोषणा गरेका थिए।
त्यसक्रममा दीपाको शरीरमा देखिएका निलडाम र चोटपटकका आधारमा मृत्यु 'शंकास्पद' भएको भन्दै अनुसन्धान गरी दोषीमाथि कारबाही गर्न मृतकका माइती पक्षले प्रहरीमा उजुरी गरेका हुन् ।
माइती पक्षले प्रहरीमा दिएको जाहेरीमा दीपालाई दाइजोको विषयमा निरन्तर मानसिक तथा शारीरिक यातना दिइँदै आएको उल्लेख छ। घटनाको अघिल्लो दिनसमेत दीपामाथि कुटपिट भएको दाबी माइतीपक्षले गरेको छ ।
जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक जितेन्द्रकुमार बस्नेतले माइती पक्षको उजुरीपछि दीपाका श्रीमान् र ससुरालाई नियन्त्रणमा लिएर अनुसन्धान गरिरहेको बताउनुभएको छ।
दिपाको विवाह गत असार ४ गते दीपककुमार यादवसँग सामाजिक परम्पराअनुसार भएको थियो ।
