सुर्खेत । पछिल्लो समय कर्णाली प्रदेशको राजधानी सुर्खेतमा लागू औषधको कारोबार बढ्दै गएको छ।
अर्काको देखासिकी, जनचेतनाको अभाव र अभिभावकले बालबालिकाको हेरचाहमा ध्यान नदिँदा युवापिढीँ नै लागूऔषधको कारोबारमा सक्रिय देखिएका छन्।
पछिल्लो ३ महिनामा जिल्ला प्रहरी कार्यालय सुर्खेतले लागूऔषधसहित ५३ जना पक्राउ गरेको छ । पक्राउ पर्नेहरूमध्ये ६ महिला र ४७ जना पुरूषमध्ये अधिकांश युवाहरु छन् भने उनीहरूको साथबाट ठूलो मात्रामा लागूऔषध समेत नियन्त्रणमा लिएको छ । यो महिनाको तथ्याङ्कले सुर्खेतमा लागूऔषधको कारोबार र सेवनकर्ताहरू बढ्दै गएको पुष्टि गरेको छ ।
लागूऔषध नियन्त्र र दुर्व्यसनी रोकथामको अभियानमा सक्रिय अगुवाहरू भने वीरेन्द्रनगरमा बढ्दो जनसंख्या, अविभावकले बालबालिकालाई पर्याप्त समय दिन नसक्नु र जनचेतनाको अभावकै कारण सुर्खेतमा लागू औषधिको प्रयोग र कारबार बढ्दै गएको बताउँछन् ।
प्रदेशमा लागूऔषधको प्रयोग र कारोबार बढ्दै गएपछि प्रदेश सरकारले यसको न्यूनीकरणका कार्यक्रम अगाडि सारेको छ । प्रहरी, लागूऔषधिको विरुद्धमा काम गर्ने संघ संस्था र नागरिक समाजको अगुवाई सचेतनामूलक कार्यक्रम गर्दै आएको छ ।
लागूऔषध नियन्त्रणका लागि चालु आर्थिक वर्षमा १५ लाख रूपैयाँ विनियोजन गरेको छ । सुर्खेतमा बढ्दो लागूऔषधिको कारोबार रोकथाम र युवा पुस्तालाई यसको कुलतबाट बचाउन अविभावक, तीनै तहका सरकार, सुरक्षा निकाय र सचेत नागरिकले हातेमालो गर्नु जरूरी छ।
