खोटाङ । खोटाङको खोटेहाङ र जन्तेढुंगा गाउँपालिकाको सिमानामा पर्ने सावाखोलामा मोटरेबल पक्की पुल सञ्चालनमा आएको छ ।
सावाखोलाको भानुमती घाटमा निर्माण गरिएको ४१ दशमलव ४० मिटर लम्बाई र ८ दशमलव ४० मिटर चौडाइको मोटरेबल पक्की पुल भौतिक पूर्वाधार विकास मन्त्रालय कोशी प्रदेशको ८ करोड २१ लाख ७२ हजार लागतमा निर्माण गरिएको हो।
पुल निर्माणसँगै खोटेहाङ साकेला र दिप्रुङ चुइचुम्मा गाउँपालिकाका स्थानीयवासीलाई उदयपुरको बेलटार हुँदै तराई जान, जन्तेढुंगा र बराहपोखरी गाउँपालिकाका स्थानीय बासिन्दालाई सदरमुकाम दिक्तेल र ईलाका प्रशासन कार्यालय खोटाङबजार आवतजावत गर्न सहज भएको छ ।
पक्की पुल दुई वर्षभित्र सम्पन्न गर्नेगरी २०८० वैशाख-११ गते निर्माण कम्पनीले सडक विभागसँग सम्झौता गरेर निर्माणको काम सुरू गरेको थियो ।
