सल्यान । जङ्गलमा लागेको आगो बस्तीमा पस्दा दुई घर जलेका छन् । आज दिउँसो छत्रेश्वरी गाउँपालिका-१ को काल्चे सल्लेरी सामुदायिक वनमा लागेको ढडेलो बस्तीमा फैलिँदा दुई वटा घर जलेको वडाध्यक्ष प्रकाश हमालले जानकारी दिनुभयो ।
दिउँसो करिब १ बजेबाट सुरु भएको आगलागी अझै नियन्त्रणमा आउन सकेको छैन । गाउँका अन्य घरहरू समेत जल्न सक्ने भएकाले नियन्त्रणको प्रयास भइरहेको वडाध्यक्ष हमालले बताउनु भयो ।
आगलागी नियन्त्रणका लागि इलाका प्रहरी कार्यालय थारमारे र इप्रका दमाचौरबाट प्रहरी टोली खटिएको जिल्ला प्रहरी कार्यालय सल्यानले जनाएको छ ।
'प्रहरी र स्थानीयले आगो नियन्त्रणको प्रयास गरिरहनुभएको छ,' जिल्ला प्रहरी कार्यालय सल्यानका प्रवक्ता इन्सपेक्टर रेशमबहादुर खत्रीले जानकारी दिनुभयो ।
