दार्चुला । बैतडीको दशरथचन्द नगरपालिका-११ नानीगाडमा शुक्रबार राति जीप दुर्घटना हुँदा एक जनाको मृत्यु भएको छ । दुर्घटनामा परी अन्य तीन जना घाइते भएका छन् ।
देहिमाण्डौबाट गिरेगडातर्फ गइरहेको बिएसी ५६५९ नम्बरको बोलेरो जीप दुर्घटनामा परेको प्रहरीले जनाएको छ । जिल्ला प्रहरी कार्यालयकाअनुसार जीप दुर्घटनामा पञ्चेश्वर गाउपालिका-५ का ५४ वर्षीय चन्चले दयालको उपचारका क्रममा मृत्यु भएको हो ।
उक्त दुर्घटनामा गम्भीर घाइते भएका दयाललाई उपचारका लागि जिल्ला अस्पताल ल्याइए पनि उपचारका क्रममा उनको मृत्यु भएको बैतडीका प्रहरी प्रवक्ता बलराम पाण्डेयले बताउनुभयो ।
यस्तै उक्त दुर्घटनामा पञ्चेश्वरकै ५२ वर्षीय लालीराम कोली, जीप चालक ३५ वर्षीय राकेस कोली र दशरथचन्द नगरपालिका-१० की ३० वर्षीया कबिता परियार घाइते भएका छन् । घाइतेहरु सबैको जिल्ला अस्पतालमा उपचार भइरहेको छ ।
दुर्घटनाग्रस्त जीप सडकबाट करिब ४० मिटर तल खसेको छ । चालकसहित चारजना मात्रै सवार जीप अनियन्त्रित भएर दुर्घटना परेको प्रारम्भीक अनुसन्धानमा बुझिएको र थप अनुसन्धान भईरहेको प्रहरीले जनाएको छ ।
