बाजुरा । बडीमालिका नगरपालिकाले 'प्रथम बडीमालिका कोदो दिवस २०८१' मनाएको छ ।
बडीमालिका नगरपालिका कृषि विकास शाखाको आयोजनामा आज सदरमुकाम मार्तडीमा सुदूरपश्चिम प्रदेशका कृषि, भूमि तथा सहकारीमन्त्री बीरबहादुर थापाले कोदो दिवसको उद्घाटन गर्नु भएको थियो ।
‘कोदो उत्पादनमा वृद्धि, बडीमालिकाको समृद्धि’ भन्ने नाराका साथ नगरपालिकाले कोदो दिवस मनाएको बडीमालिकाका नगरप्रमुख अमरबहादुर खड्काले जानकारी दिनु भयो ।
कार्यक्रममा कृषक समूहले आफ्नो खेतबारीबाट उत्पादन गरेका कोदोबाट बनाइएका विभिन्न परिकार प्रर्दशनमा राखेका थिए ।
कोदो बालीको उत्पादन बृद्धि, संरक्षण, प्रशोधन र बजारीकरण गर्नका लागि दिवसले महत्वपूर्ण भूमिका खेल्ने बडीमालिका नगरपालिका प्रमुख खड्काले बताउनु भयो ।
कोदो दिवसमा प्रतियोगितामा समावेश भएका प्रत्येक विधाका उत्कृष्ट कृषकलाई पुरस्कार समेत दिइएको थियो ।
