अर्घाखाँची । अर्घाखाँचीको भूमिका स्थान नगरपालिका -६ खिल्जीमा भैली खेलीरहेका स्थानीयलाई बसले ठक्कर दिँदा दुई जनाको मृत्यु भएको छ ।
देउसी भैलो खेलिरहेका समूहमाथि ब्रेक फेल भएको बसले किच्दा २ जनाको मृत्यु हुनुका साथै ३८ घाइते भएका छन् ।
प्यूठानतर्फ जाँदै गरेको ना ३ ख २४७१ नम्बरको बस ब्रेक फेल भएर अनियन्त्रित भइ नाचिरहेका कलाकारलाई किच्दा ७२ वर्षीय रूनी खनाल र २२ बर्षीय तारा श्रेष्ठको ज्यान गएको हो । खनालको घटनास्थलमा र श्रेष्ठको अर्घाखाँची अस्पतालमा उपचारको क्रममा मृत्यु भएको अर्घाखाँचीका प्रहरी नायव उपरीक्षक चक्रबहादुर मल्लले बताउनु भयो ।
घाइते मध्य ११ जनालाई उपचारका लागि बुटवल रेफर गरिएको छ । खिल्जी प्रहरी चौकी प्रमुख प्रहरी सहायक निरीक्षक सोमप्रसाद पाठकका अनुसार मृत्यु हुने दुई जना दर्शक र घाइते हुने अधिकांश भैलोमा नाच्ने र गाउँने कलाकार छन् । बस चालक अहिले फरार छन् ।
अर्घाखाँची अस्पतालका सूचना अधिकारी नीम रानाले ११ जना गम्भीर घाइतेको बुटवलमा रेफर गरिएको र २७ जनाको अस्पतालमा उपचार भैरहेको अर्घाखाँचीका प्रमुख जिल्ला अधिकारी बाबुराम अर्यालले बताउनु भयो । घाइतेका हातखुट्टा भाँचिएको र शरिरका विभिन्न भागमा चोटपटक लागेको छ ।
