काठमाडौं । सिरी आ च्याम्पियन इन्टर मिलान इटालियन सुपर कपको फाइनलमा प्रवेश गरेको छ । गए राति सम्पन्न खेलमा लिग लिडर एटलान्टामाथि २-० को जित हात पार्दै इन्टर फाइनलमा प्रवेश गरेको हो ।
एटलान्टा विरुद्ध लगातार सातौं जित हात पार्ने क्रममा डेन्जेल डम्फ्रिज खेलको नयक सावित भए । इन्टरका लागि दुवै गोल डम्फ्रिजले गरे ।
पहिलो हाफमा दुवै टिमले गोल रहित बराबरी खेलेका थिए । ४९औं मिनेटमा डम्फ्रिजको गोल मार्फत इन्टर मिलानले सुरूआती अग्रता बनाएको थियो । कर्नर किक मार्फत बक्सभित्र प्रवेश गरेको बललाई एटलान्टाका डिफेन्डरले क्लियर गर्न नसकेको बलमा डम्फ्रिजले शानदार ओभरहेड किक गर्दा बलले पोस्टको दिशा लिएको थियो ।
६१औं मिनेटमा डम्फ्रिजले बक्स बाहिरबाट गरेको प्रहार बारमा लागे पनि अन टारगेट रहेपछि इन्टर मिलानले २-० को अग्रता बनायो । खेलको अन्तिम सयमतिर एटलान्टाले एक गोल फर्काए पनि भीएआर परीक्षणमा अफसाइड देखिएपछि त्यसले मान्यता पााउन सकेन । यससँगै इन्टर मिलानले मंगलबार हुने फाइनल खेलमा युभेन्टस र एसी मिलानबीचको दोस्रो सेमिफाइनलको विजेतासँग प्रतिस्पर्धा गर्ने छ । दोस्रो सेमिफाइनल खेल आज राति खेलिने तालिका रहेको छ । फाइनल खेल मंगलबार खेलिने छ ।
