काठमाडौं । बाढी र पहिरोले ठूलो विध्वंश मच्चाउने गरी आएको यस वर्षको मनसुन नेपालबाट बाहिरिएको छ ।
आज कोशी प्रदेशबाट बाहिरिएसँगै यो वर्षको मनसुनको बहिर्गमन भएको जल तथा मौसम विज्ञान विभागले जनाएको छ । विभागका अनुसार असोज २२ गते कर्णाली, लुम्बिनी र गण्डकीबाट मनुसन बाहिरिएको थियो ।
जेठ अन्तिम साताबाट नेपालमा मनसुन भित्रिने र असोज मध्यसम्म अर्थात् अक्टोबर २ आसपासमा मनसुन बाहिरिने गर्छ । यसपालि चार महिना रहेर करिब १० दिन ढिला मनसुन बाहिरिएको हो ।
यसपालि जेठ २८ गते मनसुन भित्रिएको पनि विभागले जनाएको छ । यसपालि अशोज दोश्रो साताको अविरल वर्षासँगै बाढी पहिरोका कारण नेपालमा २ सय ४० भन्दा बढीको ज्यान गएको थियो । सडक र भवनसहित अर्बौ भौतिक क्षतिको त यकिन विवरण अझै आइसकेको छैन ।
