काठमाडौं । प्रतिनिधिसभाको उपसभामुखमा श्रम संस्कृति पार्टीकी सांसद रूबी कुमारी ठाकुर निर्वाचित हुनुभएकाे छ ।
प्रतिनिधिसभाको शुक्रबारको बैठकबाट राष्ट्रिय स्वतन्त्र पार्टीको समर्थनमा ठाकुर उपसभामुखमा निर्वाचित हुनुभएकाे हाे । रूबीलाई उपसभामुख निर्वाचित गरियोस् भन्ने प्रस्तावको पक्षमा २ सय २९ सांसदले मतदान गरेका थिए । उक्त प्रस्तावको विपक्षमा ५ सांसदले मतदान गरे । २२ सांसदले भने पक्ष र विपक्ष कतै पनि मतदान गरेनन् ।
संसद् अधिवेशनको यो अन्तिम बैठकमा राजनीतिक दलहरू विभाजित देखिएका छन् । सत्तारुढ दल रास्वपा र राप्रपाबीच उपसभामुख चयनलाई लिएर बैठकमा घोचपेचसमेत भयो । राप्रपाका सांसदहरूले उपसभामुखमा रास्वपासँग भएको सहमति कार्यान्वयन नभएको भन्दै असन्तुष्टि पोखेका छन् ।
