काठमाडौँ । अहिले देशमा पश्चिमी र स्थानीय वायुको प्रभाव रहेको मौसम पूर्वानुमान महाशाखाले जनाएको छ । यो प्रणालीकै कारण कोशी र मधेस प्रदेशका केही स्थान तथा बागमती र गण्डकी प्रदेशका केही स्थानमा मध्यमसम्मको वर्षा र हिमपात भइरहेको छ ।
महाशाखाका अनुसार आज दिउँसो देशका पहाडी र हिमाली भूभागमा साधारणतया बादल लाग्नेछ । देशका पहाडी र हिमाली भूभागका केही स्थान तथा कोशी तथा लुम्बिनी प्रदेशका तराई भूभागका एकदुई स्थानमा मेघगर्जन र चट्याङसहित हल्का वर्षा र हिमपातको सम्भावना छ ।
त्यसैगरी, आज राति भने हिमाली र पहाडी भूभागमा बादल लागिरहने र तराईमा मौसम सफा हुने महाशाखाको पूर्वानुमान छ । राति कोशी र गण्डकी प्रदेशका पहाडी र हिमाली भूभागका एकदुई स्थानमा मेघगर्जन र चट्याङसहित हल्का वर्षा र हिमपातको सम्भावना छ ।
यो प्रिमनसुनको अवधि भएकाले सतर्कता भने अपनाइराख्न महाशाखाले अनुरोध गरेको छ ।
