उदयपुर । उदयपुरको बेलका नगरपालिका-२ गिदेरीखोला भन्ने ठाउँमा खेत जोत्न जाँदै गरेको ट्रयाक्टर पल्टेर आइतबार दुर्घटना हुँदा चालकको मुत्यु भएको छ ।
प्रदेश–१–०४–००१ त १३३२ नम्बरको ट्रयाक्टर गिदेरीखोलाको उकालो निस्कने क्रममा पल्टिएर दुर्घटना हुँदा बेनपा-२ का सोकिन्दर चन्द्रवंशीको मृत्यु भएको हो । एक्कासी पल्टिएको ट्रयाक्टरले किच्न पुगेपछि चन्द्रवंशीको घटनास्थलमै मृत्यु भएको प्रहरीले जनाएको छ । ट्रयाक्टरमा खेत खन्ने रोटाबेटर जडान गरिएको थियो ।
मृतकको शव पोष्टमार्टमका लागि बीपी कोइराला स्वास्थ्य विज्ञान प्रतिष्ठान पठाइएको जनाइएको छ ।
