काठमाडौं । उच्चस्तरीय निर्वाचन सुरक्षा समितिले देशभरिको समग्र सुरक्षा अवस्थाको समीक्षा गर्दै संवेदनशील मानिएका क्षेत्रमा थप सुरक्षा बन्दोबस्ती मिलाउने निर्णय गरेको छ ।
निर्वाचन आयोगका कार्यवाहक प्रमुख आयुक्त रामप्रसाद भण्डारीको अध्यक्षतामा बसेको बैठकले मधेश प्रदेशका रौतहट र वीरगञ्जलगायतका स्थानमा पछिल्ला दिनमा भएका झगडा तथा झडपका घटनालाई आयोगले गम्भीरतापूर्वक लिएको छ ।
रौतहटमा विभिन्न समूहबीच उत्पन्न विवादले हिंसात्मक रूप लिएको र वीरगञ्जमा समेत ढुङ्गामुढा तथा प्रदर्शनका कारण स्थिति तनावपूर्ण बनेपछि निर्वाचन सुरक्षामा नयाँ चुनौती थपिएको विश्लेषण गरिएको छ । यी स्थानमा उत्पन्न तनावले निर्वाचनको वातावरण बिथोल्न सक्ने जोखिमलाई मध्यनजर गर्दै सुरक्षा रणनीतिमा फेरबदल गर्ने विषयमा छलफल केन्द्रित भएको छ ।
बैठकले साम्प्रदायिक र राजनीतिक झडप भएका क्षेत्रलाई अति संवेदनशील सूचीमा राखी अतिरिक्त सुरक्षा बल परिचालन गर्ने तयारी गरेको छ । स्थानीय स्तरमा हुने विवादलाई तत्काल नियन्त्रणमा लिन र निर्वाचन बिथोल्ने तत्वलाई कानुनी दायरामा ल्याउन सुरक्षा निकायलाई उच्च सतर्कतामा रहन निर्देशन दिएको छ ।
यसैबीच राष्ट्रिय मानवअधिकार आयोगले निर्वाचनको समयमा सबै पक्षलाई धैर्यता र संयमता अपनाउन आग्रह गरेको छ । आयोगले मंगलबार विज्ञप्ति जारी गरेर अरूप्रति लक्षित अमर्यादित र घृणायुक्त अभिव्यक्ति नदिन र सामाजिक सद्भाव विथोलिने गतिविधि नगर्न पनि ध्यानाकर्षण गराएको छ ।
आयोगले चुनाव प्रचारप्रसारमा बालबालिकाको प्रयोग नगर्न पनि दल तथा उम्मेदवारहरूको ध्यानाकर्षण गराएको छ ।
.png&w=400&height=300)
