काठमाडौं । शहरी विकासमन्त्री कुलमान घिसिङले आगामी निर्वाचनबाट निर्वाचित सांसदहरूको बैठक सिंहदरबारस्थित नयाँ संसद् भवनबाटै गराउने गरी तयारी अघि बढेको बताउनुभएको छ ।
सोमबार संघीय संसद राष्ट्रिय सभाअन्तर्गतको सार्वजनिक नीति तथा प्रत्यायोजित विधायन समितिको बैठकमा सांसदहरूले उठाएका प्रश्नको जवाफ दिने क्रममा उहाँले सो कुरा बताउनुभएको हो । उहाँकाअनुसार आसन्न चुनावपछि संसद् बैठक बस्नका लागि सिंहदरबार परिसरमा बनेको संसद् भवन निर्माणको कामलाई तिव्रता दिइएको छ ।
सरकारले फागनु २१ गतेलाई प्रतिनिधधि सभा सदस्यको निर्वाचन मिति तोकेको छ । त्यसअघि माघ ११ गते राष्ट्रिय सभा सदस्यको निर्वाचन हुनेछ । घिसिङले चालू आर्थिक वर्षको बजेटमा तयारी नै नभएका कार्यक्रमहरूमा बजेट समेत राखिँदा कार्यान्वयनमै समस्या आएको बताउनुभयो ।
उहाँकाअनुसार प्रारम्भिक रूपमै अध्ययन नभएका, जग्गा नै अधिग्रहण नभएका, आयोजनामा यसअघिको सरकारले बजेट राखेको पाइयो । अनावश्यक रूपमा बजेट राखिएका बाहेक अरू आयोजनाहरूको बजेट रोक्का भएको भए खोल्नका लागि अर्थमन्त्रालयसँग छलफल हुने उहाँले बताउनुभयो ।
