काठमाडौं । विपद् जोखिम न्यूनीकरण तथा व्यवस्थापनका लागि तीनवटै सरकारले समन्वय गर्दै विपद्सम्बन्धी अन्तर्राष्ट्रिय कोषहरूमा पहुँच पुर्याउन आवश्यक रहेको विज्ञहरूले बताएका छन् ।
विपद् जोखिम न्यूनीकरण तथा व्यवस्थापन प्राधिकरणले शुक्रबार गरेको गृहमन्त्रीसँग विपद् संवादमा सहभागी विज्ञहरूले प्राधिकरणमा विपद् हेर्ने छुट्टै जनशक्ति पनि आवश्यक पर्ने बताए । हाल प्राधिकरणसँग आफ्नो कर्मचारी जनशक्ति छैन् । विज्ञहरूले प्राधिकरणको नीतिगत तथा संस्थागत सुधारमा पनि जोड दिएका छन् ।
विज्ञहरूको सुझावपछि गृहमन्त्री रमेश लेखकले विपद् व्यवस्थापनको नीतिगत तथा संस्थागत सुधार सरकारको प्राथमिकता रहेको बताउनुभयो । उहाँले ऐन, नियमावली लगायतमा आवश्यक सुधार गर्न सरकार तयार रहेको जानकारी दिनुभयो ।
राजनीतिक दलहरूका प्रतिनिधिसमेत सहभागी संवादमा विपद् जोखिम न्यूनीकरण तथा व्यवस्थापनका लागि वित्तीय, जनशक्ति व्यवस्थापन तथा सुधारका क्षेत्रमा छलफल भएको थियो ।
