काठमाडौं । नेपाल नगरपालिका संघका अध्यक्ष भीम ढुंगानाले संघीय सरकारले भूमि विधेयकमार्फत स्थानीय सरकारका एकल अधिकार खोस्ने प्रयास गरेको भन्दै आपत्ति जनाउनुभएको छ ।
शुक्रबार प्रतिनिधि सभाको कृषि, सहकारी तथा प्राकृतिक स्रोत समितिमा विधेयकमाथिको छलफलमा बोल्दै उहाँले आपत्ति जनाउनुभएको हो । उहाँले संविधानले स्थानीय सरकारलाई दिएका विभिन्न २२ वटा एकल अधिकारहरू छोडिदिए आफूहरूले केही नमाग्ने बताउनु भयो ।
उहाँले पछिल्लो समय स्थानीय सरकारले थाप्ने र संघ सरकारले दिनेजस्तो अवस्था आएको भन्दै एनजीओ आईएनजीओको जस्तो व्यवहार नगर्न समेत अनुरोध गर्नुभयो ।
अध्यक्ष ढुंगानाले संविधानले भूमिकर, मालपोत र नापी स्थानीय सरकार मातहत रहने स्पष्ट व्यवस्था गरेको भन्दै त्यसको कार्यान्वयनमा सघाउन समेत अनुरोध गर्नुभयो । उहाँले भूमि विधेयक संविधानभन्दा माथि हो ? भन्दै प्रश्न गर्नुभयो ।
भूमि विधेयक संविधानको कार्यान्वयन गर्ने प्रतिबद्धतासहित आउनुपर्ने उहाँको भनाइ छ ।
