काठमाडौं । सशस्त्र प्रहरी बल नेपालका महानिरीक्षक राजु अर्यालले सुरक्षाकर्मीहरूलाई रासनको अभाव रहेको बताउनुभएको छ ।
शुक्रबार सिंहदरबारमा बसेको संघीयता सबलीकरण तथा राष्ट्रिय सरोकार समितिको बैठकमा बोल्दै उहाँले यस्तो बताउनुभएको हो । उहाँले सुरक्षाकर्मीहरूले धेरै समस्यामा रहेर काम गर्नुपरेको उल्लेख गर्नुभयो ।
काठमाडौंमा सशस्त्र प्रहरी बलले बिहानको चियादेखि बेलुकाको खानासम्म २०३ रूपैयाँमा रासनको व्यवस्था गर्नुपरेको उहाँले बताउनु भयो । सुरक्षा बललाई पोशाक किन्न ३ अर्ब ७ करोड आवश्यक पर्ने भएपनि ६१ करोड १८ लाख मात्रै दिने गरिएको र यसले गुणस्तरीय पोशाक किन्न समस्या रहेको गुनासो उहाँले गर्नुभयो । यसबारेमा सरकार गम्भीर हुनुपर्ने उहाँको भनाइ छ ।
सशस्त्र प्रहरी महानिरीक्षक अर्यालले अपराध नियन्त्रणका लागि सीमामा अभिलेख राख्ने काम गरिरहेको पनि बताउनु भयो । मनोबलका लागि ५ सय जनाको इन्स्योरेन्स गरेको उहाँले बताउनु भयो ।
