काठमाडौं । गएको जेठ १ गते राति साढे १० बजेतिर दुई वटा ताल फुटेर पहिरो जाँदा तिलगाउँबासी विस्थापित बनेका छन । तिलगाउँमा आएको बाढीपहिरोले विस्थापित भएकाहरूलाई कर्णाली प्रदेश सरकारले राहत सामग्री पठाएको छ ।
हिमपहिरो गएको ८ दिनपछि बिहीबार प्रदेश सरकारले बिहिबार सुर्खेतबाट तिल गाउँका लागि राहत सामग्री पठाएको हो । प्रदेश सरकारले पठाएको राहत सामग्री आइतबारसम्म तिल गाउँ पुग्ने नाम्खा गाउँपालिकाका उपाध्यक्ष तक्दिर लामाले बताउनुभयाे ।
पहिरोका कारण मानवीय क्षति नभएपनि भौतिक क्षति भने ठूलो भएको छ । उपाध्यक्ष लामाकाअनुसार बाढीपहिरोले तिलखोला लघु-जलविद्युत् आयोजनादेखि खेत, कुलो, खानेपानी, धर्मशालामा ठूलो क्षति पुगेको छ ।
दुई वटा ताल फुटेर बाढीपहिरो जाँदा तिलगाउँका १८ परिवारका ३२ जना त्रिपालमा बसिरहेका पहिरो पिडितका लागि प्रदेश सरकारले ५ सेट टेन्ट (अस्थायी घर), २० क्विन्टल खाद्यान्न , १८ सेट सोलार र १८ सेट म्याट्रेस सेटलगायतका राहत सामग्री पठाइएको आन्तरिक मामिला तथा कानुन मन्त्रालयले जनाएको छ।
जिल्ला प्रशासन कार्यालय हुम्लाको माग बमोजिम राहत पठाइएको मन्त्रालयका प्रवक्ता उत्तम गौतमले जानकारी दिनुभयाे । यस्तै तिलगाउँको बाढी पहिरोको कारण पत्ता लगाउन सरकारी टोली लिमि पुगेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका सिनियर डिभिजनल इन्जिनिर सुशील कुमार श्रेष्ठ नेतृत्वको तीन सदस्यीय टोली पहिरो आएको स्थान तिल गाउँ पुगि सकेको छ ।
टोलीमा जल तथा मौसम विज्ञान विभागका हाइड्रोलोजिस्ट इन्जिनियर सौहाद्र जोशी र खानी तथा भूगर्भ विभागका सिनियर डिभिजनल जिओलोजिस्ट शिवकुमार बास्कोटा रहेका छन ।
