ताप्लेजुङ । ‘मुक्कुमलुङ पक्षधर’ बाट गठित उच्च स्तरीय वार्ता टोलिका संयोजक खगेन्द्र फेम्बो, श्रीप्रसाद लिम्बुसहित पाँच जना धरौटीमा छुटेका छन् । जिल्ला अदालत ताप्लेजुङका न्यायाधिश विकास श्रेष्ठको इजलासले धरौटी तारेखमा छाड्न आदेश दिएको हो ।
फरार प्रतिवादी सूचीमा रहेका उनीहरू शुक्रबार अदालतमा हाजिर भएका थिए । निवेदनसहित उपस्थित भएका उनीहरूको बयान, थुनछेक बहसपछि आदेश आएको हो ।
धरौटीमा छुटेकाहरूमा फेम्बो, लिङ्खिम, पुर्ण बहादुर पालुङवा, रोशन कङ्लिवा (सरोज), मुक्साम लिम्बू रहेको अदालतका स्रेस्तेदार मनोज बरालले जानकारी दिनुभयो ।
उनीहरू विरुद्ध आपराधिक उपद्रव तथा हुलदुङ्गा शीर्षकको मुद्दा दर्ता भएको थियो । काफ्लेपाटीमा निर्माणाधिन केबलकार वटम स्टेसन र बिरेन्द्रचोकमा भएको राँके जुलुस घटनाको नेतृत्व गरेको बयान यसअघि पक्राउ परेका १८ जनाले दिएका थिए ।
उनीहरूको बयानको आधारमा पक्राउ परेकाबाहेक नौ जनालाई प्रतिवादी बनाइएको थियो । चार जना अझै फरार प्रतिवादीको सूचीमा छन् ।
उनीहरू विरुद्ध पक्राउ पुर्जी जारी रहेको अदालतले जनाएको छ । यसअघि धरौटी तारिखमा छुटेका १८ सहित शुक्रबार छुटेका ५ जनालाई चैत २१ गते अदालतमा उपस्थित हुन तारिख दिएको अदालतले जनाएको छ ।
स्रेस्तेदार बरालका अनुसार मुद्दा शीर्षक एउटै भएपनि भूमिकाका आधारमा धरौटी र सजाय निर्धारण फरक हुन सक्छ । अदालतले धरौटी रकमभने सबैर्ला समान तोकेको छ । मुद्दाको अन्तिम फैसला हुन बाँकी छ ।
गत फागुन ८ गते काफ्लेपाटी नजिक केबलकार बटम स्टेसनमा झडप भएको थियो । फागुन १० गते बेलुकी विरेन्द्रचोकमा राँके जुलुस निकालिएको थियो । राँके जुलुसका क्रममापनि सुरक्षाकर्मी र ‘मुक्कुमलुङ पक्षधर’ बीच झडप भएको थियो । दुवैतर्फका घाइते भएका थिए । सोही घटनामा संलग्न भएको भन्दै प्रहरीले मुद्दा चलाएको हो ।
