बाँके । सरकारले औद्योगिक क्षेत्र व्यवस्थापन लिमिटेडको विभिन्न १११ उद्योग स्थापना गर्ने परियोजना कार्यान्वयन गर्न र परियोजना क्षेत्र बाँकेको नौबस्तामा हुँदै आएको अवरोध र अतिक्रमण हटाउन ठूलो संख्यामा सुरक्षाबल परिचालन गरेको छ ।
नेपाल प्रहरी र सशस्त्र प्रहरी बल प्रयोग गरी ट्र्याक खोल्ने क्रममा आज परियोजना स्थलभित्र निर्माण गरिएका घर गोठहरू धमाधम भत्काउने क्रमलाई तीव्र पारेको छ । माइकिङ गरे लगतै बैजनाथ गाउापालिका- ३ मा पर्ने रत्नराजमार्ग छेउबाट दक्षिणतर्फका घर गोठसँगै सबै अतिक्रमित सबै बस्ती जेसीभी लगाएर भत्काउन थालिएको छ ।
पहिलो दिनको पहिलो गोठ नै हंशजंग शाहको परेको थियो । राजमार्ग नजिकै उहाँको अर्को पक्की घर छ । तर शाह आफू अन्यायमा परेको बताउनुहुन्छ ।
औद्योगिक क्षेत्र व्यवस्थापन लिमिटेडले १० वर्षअघि नै यो क्षेत्रमा विभिन्न १११ उद्योग स्थापना गर्ने लक्ष्यका साथ परियोजना अघि सारेको थियो । तर राजनीतिक आडमा हुँदै आएको अतिक्रमण हटाउन नसक्दा परियोजनाले कुनै काम गर्न सकेको थिएन । ठूलासाना सबै राजनीतिक पार्टीका नेताको आडमा सुरुमा २५८ घर गोठ निर्माण गरिएको थियो ।
यो क्रम बढेर करिब ४ सय पुगेको औद्योगिक क्षेत्र व्यवस्थापन लिमिटेडले जनाएको छ । लिमिटेडले अब केही घर क्षेत्र छाडेर ३६५ बिघामा परियोजना अन्तर्गतका निर्माण कार्य रोकिन नदिने पक्षमा छ ।
प्रमुख जिल्ला अधिकारी धर्मराज जोशीले सुरक्षा जोश देखाउँदै अतिक्रमण हटाई छाडने प्रतिबद्धता देखाउँदै अवरोध गर्ने जोसुकैलाई पनि तत्काल नियन्त्रणमा लिने आदेशका साथ परियोजना क्षेत्रभरि नै यसरी ठूलो संख्यामा सुरक्षाकर्मी तैनाथ गरिएको थियो । जसले गर्दा कसैले कुनै अवरोध गर्न त सकेनन् नै खुम्चिएर बसेको औद्योगिक क्षेत्र व्यवस्थापन लिमिटेडका अधिकारीले पश्चिम नेपालमा उद्योग स्थापना र संचालनको लहर ल्याउन हौसिएको बताएका छन् ।
