संखुवासभा । खाँदबारी किमाथांका सडक २ दिन पछि खुलेको छ । कोशी राजमार्ग अन्तर्गत खाँदबारी-किमाथांका सडक खण्डको भोटखोलामा सुख्खा पहिरो खसेपछि सोमबार बिहानदेखि सडक अवरुद्ध भएको थियो ।
भोटखोला गाउँपालिकाको हटिया र हुङगुङ बीचको पहिरो पन्छाएपछि बुधबारबाट सडक सञ्चालनमा आएको उत्तर दक्षिण कोशी सडक आयोजनाका सूचना अधिकारी नरेश जिरेलले जानकारी दिनुभयो । उहाँका अनुसार सडक खण्डमा १५ मिटर माथिबाट ठूलाठूला ढुङ्गासहित सुख्खा पहिरो खसेको थियो ।
यो सडक छिमेकी देश चीन-भारत जोड्ने सबैभन्दा छोटो सडक हो । राष्ट्रिय गौरवको खाँदबारी– किमाथांका सडक आयोजनामा हालसम्म ५३ करोड बढी खर्च भइसकेको छ ।
