ताप्लेजुङ । केबलकार सम्बन्धि विवाद बढ्दै जाँदा जिल्ला प्रशासन कार्यालय ताप्लेजुङले सदरमुकाम फुङलिङ र काफ्लेपाटी क्षेत्रमा निषेधाज्ञा जारी गरेको छ ।
आज बिहान ५ बजेदेखि पाँच जनाभन्दा बढी भेला हुन नपाउने, सभा जुलुस, घेराउ गर्न नपाउने गरी निषेधाज्ञा लगाइएको प्रमुख जिल्ला अधिकारी नेत्रप्रसाद शर्माले जानकारी दिनुभयो । काफ्लेपाटी क्षेत्रमा काफ्लेपाटीदेखि बलुडाँडा, र केबलकार स्टेशन क्षेत्रमा निषेधाज्ञा जारी गरिएको छ ।
सदरमुकाम फुङलिङमा हिजो बेलुका प्रहरी र आन्दोलनकारी बीच पटक/पटक झडप भएको थियो । आन्दोलनकारी तर्फ घाइते भएका तीन जनालाई धरानको घोपा अस्पताल पुर्याइएको र नौ जनाको जिल्ला अस्पताल ताप्लेजुङमा उपचार भइरहेको आन्दोलन समूहका अगुवा किर्तिमान मादेनले जानकारी दिनुभयो ।
यता प्रहरी तर्फभने नौ जना घाइते भएको र उनीहरूको जिल्ला अस्पतालमा उपचार भइरहेको जिल्ला प्रशासन कार्यालयले जनाएको छ ।
