सुनसरी । धरान उपमहानगरपालिकाका प्रमुख हर्कराज राई अर्थात् हर्क साम्पाङले अख्तियार दुरुपयोग अनुसन्धान आयोगले सोधेको पत्रको जवाफ ठेट र उटपट्याङ शैलीमा दिनु भएको छ ।
माघ २ गतेको पत्रको जवाफ भन्दै साम्पाङले आज अख्तियारलाई पठाएको पत्रमा धरानको खानेपानी बोर्ड स्वायत्त निकाय भएको जनाउँदै यसले नगरबासीलाई पानीको आपूर्ति गर्न सबैखाले विधि अपनाउन सक्ने उल्लेख गर्नु भएको छ ।
'बिहान उठ्ने बित्तिकै टोइलेट जानुपर्छ पानी छैन भने के हुन्छ त्यो भनिरहन पर्दैन होला', उहाँले अख्तियारलाई पठाएको जवाफी पत्रमा लेखिएको छ, 'केही छिनपछि भात पकाउनु परो । भात पकाउन पानी चाहिन्छ । भात खाएपछि हातमुख चुठ्नुपरो त्यसको लागि नि पानी चाहिन्छ । जुठोभाँडा लडाइराख्न मिलेन धुनै परो त्यसका लागि नि पानी नै चाहिन्छ ।'
पानीको प्रयोग कहाँ-कहाँ हुन्छ भन्ने सबै उल्लेख गर्दै मेयर राईले पत्रमा बेलिबिस्तार लगाउनु भएको छ । उहाँको पत्रमा आफूले श्रमदान गरेर कसरी पानी ल्याइयो भन्ने सबिस्तार वर्णन गरिएको छ । कोशीको पानी धरानलाई दिन्छु भन्ने सिंहदरबारले वर्षौंदेखि बिन्ति बिसाउँदा पनि नसुनेकाले भोजे गाग्री लिएर सिंहदरबार पुगेको समेत उहाँले उल्लेख गर्नु भएको छ ।
'जनतालाई पानी चाहिएको छ है तत्कालै पानी चाहिएको छ । आश्वासन र कागजको खोस्टा होइन पानी चाहिएको छ के,' उहाँको पत्रमा छ, 'त्यसैले हाम्ले श्रमदान गर्नुपरेको हौ...खोई कुरा बुझ्या ।'
उहाँले श्रमदानमा अनियमितता भयो भन्दै वाइयात उजुरी दिनेले कतिवटा पाइप किनेर दियो, कति श्रमदान गर्यो भन्दै प्रश्नसमेत गर्नु भएको छ । उहाँले अख्तियारलाई कोकाहा खानेपानी श्रमायोजन-२ चलिरहेको जनाउँदै लेख्नु भएको छ, 'एक दिन आउनु है मुहानबाट धरानसम्म हिँड्दै हिँड्दै पाइप गन्न र प्रोजेक्ट हेर्न । कम्ता रमाइलो छैन ।'
मेयर साम्पाङले पानीमा राजनीति गर्नु हुँदैन भन्दै 'पानी माग्न जनता त्यता आउलान् है फेरि !' अख्तियारलाई लेखेको पत्रको बिट मार्नु भएको छ ।
यस्तो छ मेयर साम्पाङले अख्तियार दुरुपयोग अनुसन्धान आयोगलाई लेखेको जवाफ
