काठमाडौं । कान्तिपुर मिडिया ग्रुपको प्रमुख कार्यकारी अधिकृत (सीईओ)मा महेश स्वाँर नियुक्त हुनुभएको छ ।
कान्तिपुर मिडिया ग्रुपअन्तर्गत लामो समयदेखि फरकफरक भूमिकामा रहिसक्नुभएका स्वाँर कान्तिपुर मिडिया ग्रुपको सीईओमा नियुक्त हुनुभएको हो ।
दुई दशकभन्दा लामो समयदेखि व्यवस्थापन र बजारमा अनुभव बटुल्नुभएका स्वाँरसँग बोटलर्स नेपाल र तराई टेलिभिजनमा काम गरेको अनुभव छ । उहाँ नेपाल मार्केटिङ संघका अध्यक्ष समेत हुनुहुन्छ । स्वाँरले ‘हार्वर्ड बिजनेश स्कुल’बाट मार्केटिङ स्ट्राटेजी कोर्स र व्यवस्थापनमा स्नातकोत्तर गर्नु भएको छ ।
यसैगरी कान्तिपुर टेलिभिजनको प्रमुख सञ्चालन अधिकृत (सीओओ) मा सुरज सिंह ठकुरी नियुक्त हुनुभएको छ ।
चर्चित कार्यक्रम प्रस्तोता तथा निर्माता ठकुरी यसअघि कान्तिपुर टेलिभिजनका वरिष्ठ निर्माता र ‘कल कान्तिपुर’ तथा ‘इट्स माइ शो’ जस्ता चर्चित कार्यक्रममा प्रस्तोताको रुपमा रहनुभएको थियो । सफल म्युजिक भिडियो निर्देशकको छवि बनाउनु भएका उहाँ कलाकारसमेत हुनुहुन्छ ।
स्वाँर र ठकुरीको आगमनबाट कान्तिपुर मिडिया ग्रुपले थप उचाइ हासिल गर्ने विश्वास लिएको छ ।
