काठमाडौं । अंग्रेजी वर्ष सन् २०२४ को बिदाइ गरिएको छ । नेपाल लगायतका विश्वका थुप्रै देशले राति १२ बजे २०२४ को बिदाइ र नयाँ वर्ष २०२५ को स्वागतको तयारी गरिरहँदा केही देशले भने २०२५ लाई आफ्नो आँगनमा भित्र्याइसकेका थिए ।
प्रशान्त महासागरस्थित टापु देश किरिबास नयाँ वर्ष २०२५ लाई स्वागत गर्ने विश्वकै पहिलो देश बनेको छ । किरिबासपछि न्युजिल्यान्डले पनि नयाँ वर्षलाई स्वागत गरिसकिएको छ । न्युजिल्यान्डको उत्तरी टापुस्थित अकल्यान्डमा भव्य आतसबाजी गरेर नयाँ वर्ष २०२५ को स्वागत गरिएको छ । यस्तै अस्ट्रेलियाको सिड्नीमा पनि भव्य आतसबाजीका साथ नयाँ वर्षको स्वागत गरिएको छ ।
जापान र दक्षिण कोरियाले पनि नयाँ वर्षको स्वागत गरिसकेका छन् । यो संवत् नेपालमा प्रचलनमा नभए पनि भ्रमणमा आउने विदेशीले यसको प्रयोग गर्छन् । केही वर्ष अघिदेखि नेपालका विभिन्न स्थानमा इस्वी संवत् मनाउने गरिएको छ ।
विदेशी पर्यटकको भीडभाड हुने काठमाडौँको ठमेल, बौद्ध, पोखरा, सौराहा, लुम्बिनीलगायत स्थानमा ‘न्यू इयर इभ’ का नाममा यो संवत् मनाइन्छ । मङ्गलबार बेलुकीदेखि नै राजधानीको ठमेल, बौद्ध, स्वयम्भू, नयाँ सडकलगायत क्षेत्रमा विशेष चहलपहल देखिएको छ ।
