काठमाडौं । भूटानी राजा जिग्मे खेसर नाम्गेल वाङचुकले स्वयम्भूनाथ र बौद्धनाथको दर्शन गर्नु भएको छ । आज बिहान नेपाल आइपुग्नु भएका भूटानी राजा वाङचुकले पूजा अर्चना सहित विश्वसम्पदा सूचीमा सूचीकृत स्वयम्भूनाथको दर्शन गर्नु भएको हो ।
स्वयम्भू व्यवस्थापन तथा संरक्षण महासमितिका पदाधिकारीले स्वयम्भूनाथ परिसरमा भूटानी राजालाई स्वागत गर्नु भएको थियो । करिब आधा घण्टा त्यहाँ रहनु भएका भूटानी राजाले स्वयम्भूबाट काठमाडौं उपत्यकाको दृश्यावलोकन समेत गर्नु भएको थियो । स्वयम्भूबाट उहाँ बौद्धनाथ पुग्नु भएको थियो ।
भारतबाट स्वदेश फर्कने क्रममा काठमाडौं आउनु भएका भूटानी राजा वाङचुक आजै स्वदेश फर्कनु हुने परराष्ट्र मन्त्रालयले जनाएको छ ।
