जनकुपरधाम। मधेश प्रदेशका गृह सञ्चार तथा कानुन मन्त्री राजकुमार लेखीले चन्दा माग्दै आफूलाई धम्कीपूर्ण फोन आउने गरेको बताउनुभएको छ ।
मन्त्रालयमा पत्रकार सम्मेलन गर्दै मन्त्री लेखीले जयकृष्ण गोइत नेतृत्वको जनतान्त्रिक तराई मुक्ति मोर्चाले चन्दा माग्दै आफू र मधेश प्रदेशका केही मन्त्रीलाई धम्काएको बताउनुभएको हो । आफूलाई पछिल्ला केही महिनादेखि गोइतले पटक पटक फोन गरेर आर्थिक सहयोग मागेको र नदिएपछि धम्काउने गरेको उहाँको भनाइ थियो ।
मधेश सरकारका अरु मन्त्रीहरुलाई समेत धम्कीपूर्ण फोन आउने गरेको उहाँले बताउनुभयो । धम्की दिनेहरुलाई कानुनी दायरामा ल्याउने प्रतिबद्धता पनि उहाँले व्यक्त गर्नुभयो । फरक प्रसंगमा मन्त्री लेखीले जनकपुरधामको विवाह पञ्चमी महोत्सवमा १४ सय सुरक्षाकर्मी परिचालन गरिने जानकारी पनि दिनुभयो ।
