चितवन । चितवनमा पिकनिक खाएर फर्कदै गरेको स्कुल बस दुर्घटना हुँदा २८ जना घाइते भएका छन् ।
आज अपरान्ह कालिका-९ स्थित उपरदाङ्गढीबाट पिकनिक खाएर फर्कदै गर्दा कालिका-४ स्थित चित्रवन स्कुलको बस दुर्घटनामा परेको हो । दुर्घटनामा बसमा सवार ३२ जना मध्ये २८ जना घाइते भएको जिल्ला प्रहरी कार्यालय चितवनले जनाएको छ ।
घाइते मध्ये एक बालिकाको अवस्था गम्भीर रहेको छ । घाइतेहरु मध्ये २२ जनाको चितवन मेडिकल कलेज र ६ जनाको पुरानो मेडिकल कलेज भरतपुरमा उपचार भइरहेको छ । बसका चालक जितेन्द्र चौधरीले बसको ब्रेक फेल भएपछि विधार्थीलाई जोगाउन बसलाई सडक छेउको भित्तामा ठोक्काएको बताउनु भयो ।
पहाडी बाटोमा ब्रेकले काम गर्न छाडेपनी चालकले दुई वटा मोड सहजै पार गराएका थिए । ठूलो घुमाउरो बाटो आएपछि अन्तिम विकल्पको रुपमा बसलाई भित्तोमा ठोक्काएको चालकले बताउनु भयो । बसका सह-चालक गोबिन्द पौडेलले विधार्थीलाई जोगाउन बसको क्याबिनबाट पछाडि सिटमा सार्न सफल भएकोले ठूलो दुर्घटना हुनबाट जोगिएको बताउनु भयो ।
पिकनिक खान स्कुलमा अध्ययनरत ५ देखि १० कक्षा सम्मका विधार्थी र शिक्षकहरू गएका थिए ।
