धनकुटा । तिहार नजिकिएसँगै धनकुटाका विभिन्न स्थानमा लाग्ने साप्ताहिक र पाक्षिक हाट बजारमा तिहारको चहलपहल सुरु भएको छ ।
बजार पहुँचबाट टाढा रहेका गाउँमा साप्ताहिक र पाक्षिक हाट बजारमा तिहारका लागि किनमेल गर्नेको घुँइचो बढ्न थालेको हो । यस्ता हाटबजारमा दैनिक उपभोग्य वस्तुसँगै तिहारमा दाजुभाइ र दिदीबहिनीलाई उपहारको रूपमा दिइने, कपडा, ढाकाटोपी, नरिवल, काजु किसमिस, भाइमसला, रङ, काटाका भाँडा तथा श्रृङ्गारका सामग्रीको किनबेच बढेको छ ।
तिहारमा बिक्री राम्रो हुने देखेर घुमन्ते व्यापारीहरू थोक तथा खुद्रा सामग्री लिएर गाउँसम्म पुग्ने गरेका छन् । सदरमुकाम धनकुटा बजार, हिले, सिंधुवा, काजीमान, आँखीसल्ला, फलामेटार, लावरबोटे, डाँडाबजार, मौनबुधुक र बुधबारेलगायत २५ भन्दा बढी ठाउँमा यस्ता हाट बजार लाग्दै आएका छन् ।