जनकपुर । मधेश प्रदेश सरकारले संविधान जारी भएको ९ वर्षपछि औपचारिक रुपमा पहिलो पटक संविधान दिवस मनाएको छ ।
सरकारी कार्यालयहरुले विगतका वर्षहरुमा सविधान दिवस मनाएपनि यस वर्ष मधेश प्रदेश सरकारका गृह संचार तथा कानुन मन्त्रालयले जनकपुरमा संविधान दिवस मनाएको हो ।
प्रमुख अतिथिको रुपमा सहभागी मुख्यमन्त्री सतिश कुमार सिंहले संविधानमा भएका त्रुटीहरुलाई संसोधन गरेर समानुपातिक र समावेशी संविधान बनाउनपर्नेमा जोड दिनु भयो । ‘संविधानमा यदि केही त्रुटी छन् भने मापदण्ड बनाएर ती त्रुटीहरू सच्याउनु पर्यो । समावेशिताको पूर्ण पालना हुनुपर्यो,’ उहाँले भन्नुभयो ।
संविधान दिवसको अवसरमा सभामुख रामचन्द्र मण्डलले विभिन्न आन्दोलन र शाहादत्तवाट प्राप्त संविधानलाई सम्मान गर्नुपर्छ भन्दै कालो दिवस मनाउनु मुखर्ता रहेको बताउनु भयो ।
गृहमन्त्री राज कुमार लेखीको अध्यक्षतामा भएको कार्यक्रममा देशभक्ति गीत संगतिका साथै विभिन्न सांस्कृतिक कार्यक्रमहरु गरिएको थियो । विहान जनकपुरको रामानन्द चोकवाट प्रभातफेरी समेत निकालिएको थियो ।