दोलखा । रोल्वालिङ खोलामा आएको बाढीले पदमार्गको झोलुंगे पुल र दुईवटा फड्के बगाएको छ । पुल र फड्के बगाएपछि च्छोरोल्पा हिमताल पुगेका १४ जना आन्तरिक पर्यटक पाँच दिनदेखि अलपत्र परेका छन् ।
दोलखा, सोलुखुम्बुलगायत जिल्लाबाट घुम्न गएका आन्तरिक पर्यटक गौरीशंकर गाउँपालिका ९ को पर्यटकीय गाउँ ना र बेदिङको बीचमा ठूलो पहिरो गएपछि ना मा अलपत्र छन् । उद्धारका लागि गएको सुरक्षाकर्मीको टोली बाढीले फड्के र पुलसहित पदमार्गमा क्षति गरेपछि सुर्मुचेबाट फर्किएको प्रमुख जिल्ला अधिकारी टुवराज पोखरेलले बताउनुभयो ।
प्रतिकूल मौसमका कारण उनीहरूको हवाई उद्धार पनि हुन सकेको छैन । सञ्चार सम्पर्कविच्छेद भएका कारण उद्धारमा थप कठिनाइ भएको उहाँले बताउनुभयो । ना र बेदिङ गाउँसँग सञ्चार सम्पर्क पनि हुन नसकेकाले त्यहाँका स्थानीयको अवस्था यकिन गर्न नसकिएको प्रमुख जिल्ला अधिकारी पोखरेलले बताउनभयो ।
यी गाउँका बासिन्दासँग एक सातालाई मात्रै पुग्ने रासन भएकाले मौसम खुल्नेबित्तिकै ना र बेदिङ गाउँमा खाद्यान्नलगायत सहायता सामग्री पुर्याउने तयारी प्रशासनले गरेको छ । गत शुक्रबार रोल्वालिङ खोलामा आएको बाढीले पदमार्गको डोगाङका सानाठुला आठवटा होटेल बगाउनुका साथै एक जनालाई बेपत्ता बनाएको थियो ।
उता उदयपुरमा पहिरोले घर पुरिँदा त्रियुगा नगरपालिका १५, खाँबुकी ९ वर्षीया रुपकला मगरको मृत्यु भएको छ । रुपकलाकी आमा र भाइ घाइते भएको प्रहरीले जनाएको छ । पहिरोले चार घर पुरिएको र अरु सात घर जोखिममा परेका छन् ।
हिजोदेखिको अविरल वर्षाले सुनसरी र मोरङका धेरै ठाउँ जलमग्न भएका छन् । सुनसरीको चतरा, धरान इटहरी, मोरङको केराबारी लेटाङ सुन्दरहरैंचामा क्षेत्रका नदी खोलामा पानीको सतह खतरा तहभन्दा माथि पुगेको छ । बाढीले सुनसरी मोरङ औद्योगिक करिडोरका एक दर्जन उद्योग डुबेका छन् ।
उता पूर्वी नवलपरासीको गैंडाकोट नगरपालिका १ स्थित नारायणी नदी किनारमा दुई पुरुष र एक महिलाको शव फेला परेको छ । बाढीले बगाएर शव ल्याएको हुनसक्ने प्रहरीको अनुमान छ ।
त्रियुगा नदीको बाढीले सप्तरीको सप्तकोशी नगरपालिकाका २ फत्तेपुरका ५४ घर डुबानमा परेका छन् ।
