काठमाडौं । भ्रष्टाचार मुद्दा दायर भएसँगै वैकुण्ठ अर्याल मुख्यसचिवबाट स्वतः निलम्बित हुनुभएको छ । सचिवबाट अवकाश पाउन तीन दिन बाँकी रहँदा २०८० जेठ ३२ गते मुख्यसचिव नियुक्त अर्याल भ्रष्टाचार मुद्दाका कारण पदबाट हट्ने पहिलो मुख्यसचिव हुनुहुन्छ । कर्मचारी प्रशासनको सबैभन्दा माथिल्लो पद मुख्यसचिव बन्ने, बनाउने र त्यसपछिको जिम्मेवारी सुनिश्चित गर्ने दाउमा अर्यालभन्दा अगाडि ३ मुख्यसचिवले कार्यकाल पूरा गरेका थिएनन् ।
कार्यकाल सकिनै तीन दिन बाँकी रहँदा अर्याललाई मुख्यसचिवमा बढुवा गरिएको थियो । २०४९ सालमा शाखा अधिकृतबाट निजामती सेवामा प्रवेश गर्नुभएका अर्यालले मुख्यसचिव नियुक्त नभएको भए २०८० असार २ मा अवकाश पाउनुहुन्थ्यो । अर्याल भ्रष्टाचार मुद्दाका कारण पद त्याग्नुपर्ने स्थितिमा पुगे पनि कार्यकाल नसकिँदै सरकारले राजीनामा गराएका मुख्यसचिवको सूची भने लामो छ ।
मुख्यसचिव शंकरदास बैरागीलाई उहाँको तीनवर्षे कार्यकाल सकिन साढे ३ महिना बाँकी छँदै सरकारले राजीनामा गर्न लगाएको थियो । सुरक्षा सल्लाहकार बनाउने सर्तमा बैरागीलाई मुख्यसचिवबाट राजीनामा गर्न लगाइएको थियो ।
कार्यकाल पूरा नगरी मुख्यसचिव पदबाट राजीनामा गर्ने परम्परा भने सोमलाल सुवेदीले सुरु गर्नुभएको थियो । एसियाली विकास बैंकको वैकल्पिक सल्लाहकारको जागिर खान सुवेदी मुख्यसचिवबाट राजीनामा दिएर फिलिपिन्स जानुभएको थियो ।
पूरा कार्यकाल काम गर्न नदिई सरकारले राजीनामा गराएका अर्का मुख्यसचिव हुनुहुन्छ- लोकदर्शन रेग्मी । रेग्मीलाई बेलायतको राजदूत बनाउन सरकारले राजीनामा दिन लगाएको थियो । रेग्मी उनै व्यक्ति हुनुहुन्छ- जसलाई सरकारले अहिले भारतका लागि राजदूतमा सिफारिस गरेको छ । रेग्मीपछि मुख्यसचिव हुनुभएको थियो- शंकरदास बैरागी । रेग्मीले कार्यकाल पूरा गरेको अवस्थामा बैरागी मुख्यसचिव बन्नुहुने थिएन । बैरागीले उमेर हदका कारण सचिवबाटै अवकाश पाउनुहुन्थ्यो ।
मुख्यसचिवको कार्यकाल तीन वर्षको हुन्छ । तीन वर्ष पूरा नहुँदै ५८ वर्ष पुगे सेवाबाट अवकाश पाउने व्यवस्था निजामती सेवा ऐन- २०४९ मा छ । तर यी चारैजना मुख्यसचिवले कार्यकाल पूरा गरेनन् ।
यो पनि...
भ्रष्टाचार मुद्दामा मुख्यसचिव वैकुण्ठ अर्यालसहित बहालवाला को-को परे ?
भ्रष्टाचार मुद्दा दायरसँगै मुख्यसचिव वैकुण्ठ अर्याल पदबाट निलम्बित