बागलुङ । राष्ट्रपति रामचन्द्र पौडेलले बागलुङस्थित प्रशिद्ध धार्मिक शक्तिपीठ कालिका भगवतीको पूजाअर्चना गरेका छन् । बागलुङ नगरपालिका १ मा अवस्थित कालिका मन्दिरमा पुगेर राष्ट्रपति पौडेलले दर्शन गर्नुका साथै विशेष पूजा गरेका हुन् । राष्ट्रपति पौडेल राष्ट्र प्रमुख भएपछि पहिलोपटक कालिका मन्दिरमा पुगेर पूजा गरेका हुन् ।
बागलुङ उद्योग वाणिज्य संघले आयोजना गरेको सातौं बागलुङ महोत्सवको अवसरमा यहाँ आएका पौडेल बिहान पौने ११ बजेट कालिका मन्दिर पुगेका थिए । पोखरा बागलुङ राजमार्गबाट पैदलै मन्दिर पुगेर उनले पूजा गरेका हुन् ।
उक्त अवसरमा बागलुङ कालिका भगवती गुठी व्यवस्थापन समितिका अध्यक्ष कुमार खड्का र उपाध्यक्ष निसान खड्काले राष्ट्रपतिलाई मन्दिरको ऐतिहासिक महत्वबारे जानकारी गराए । बागलुङ नगरपालिकाका प्रमुख बसन्तकुमार श्रेष्ठ, प्रमुख जिल्ला अधिकारी खगेन्द्रप्रसाद रिजालसहितका अधिकारीले राष्ट्रपतिको स्वागत गरेका थिए ।
बुधबारै राष्ट्रपति पौडेल बागलुङ नगरपालिका वडा नं. ४ को कुडुलेस्थित श्रीधराचार्य शालिग्राम संग्राहलय पनि पुगेका छन् । उनले यहाँ निर्मित भूमिगत शालिग्राम संग्राहलय अवलोकन गरे । यहाँको रंगबैकेटेश्वर मुक्तिनारायण मन्दिर पनि दर्शन गरे । संग्राहलयमा १ लाख १५ हजार शालिग्राम संग्रह गरिएको छ । कालीगण्डकी नदीमा मात्रै पाइने शालिग्रामलाई लोप हुन नदिन यहाँ संग्राहलय बनाइएको हो ।
मंसिर २१ गतेसम्म सञ्चालन हुने बागलुङ महोत्सवमा यहाँको कला संस्कृति र ऐतिहासिक स्थलको पहिचान, प्रर्वद्धन र स्थानीय उत्पादनको बजारीकरण गरिने संघका अध्यक्ष नरेश कंडेलले जानकारी दिए । मेलामा महिला तथा पुरुष भलिबल प्रतियोगिता, राष्ट्रिय कलाकारहरुको प्रस्तुति र जातजातिका भाषा र संस्कृतिसम्बन्धी झाँकीसमेत प्रस्तुत हुने छन् ।
