काठमाडौं । रुसले गए राति युक्रेनको राजधानी किएभमा भीषण ड्रोन र मिसाइल हमला गरेको छ । आक्रमणमा तीन बालबालिकासहित कम्तीमा १४ जनाको मृत्यु र ३८ जना घाइते भएको अधिकारीहरूले जनाएका छन्।
रुसले रातभरमा ५ सय ९८ ड्रोन र ३१ मिसाइलमार्फत् आक्रमण गरेको युक्रेनी वायु सेनाले जनाएको छ । राष्ट्रपति भोलोदिमिर जेलेन्स्कीले यस आक्रमणलाई “योजनाबद्ध हत्या” भन्दै आलोचना गर्नुभएको छ । आक्रमणबाट किएभस्थित ब्रिटिश काउन्सील तथा युरोपेली आयोगको भवन पनि क्षतिग्रस्त भएका छन् ।
युक्रेनी विदेशमन्त्री आन्द्रेई सिबिहाले रुसले कूटनीतिज्ञहरूलाई लक्षित गरेको भन्दै यो आक्रमण “भियना सम्झौतामाथिको प्रत्यक्ष उल्लंघन” भएकाले विश्वव्यापी निन्दा गर्न आह्वान गर्नुभएको छ । यता रुसले पनि बुधबार रातभरमा युक्रेनद्वारा प्रहार गरिएका १ सय २ वटा ड्रोन नष्ट गरिएको दाबी गरेको छ ।
अमेरिकी राष्ट्रपति डनल्ड ट्रम्प र रुसी समकक्षी भ्लादिमिर पुटिनबीच प्रत्यक्ष भेटवार्ताको दुई हप्तामै युक्रेनमाथि आक्रमण भएको हो । शुक्रबार न्यूयोर्कमा युक्रेनी प्रतिनिधिमण्डलले अमेरिकी अधिकारीहरूसँग भेटेर रुससँगको युद्ध अन्त्य गर्ने विषयमा छलफल गर्ने कार्यक्रम छ।
