काठमाडौं । पाकिस्तानको खैबर पख्तुनख्वा प्रान्तस्थित सैन्य पोस्टलाई लक्षित गर्दै भएको आत्मघाती आक्रमणमा १२ सैनिकको मृत्यु भएको छ ।
आतंककारी समूहले खैबर पख्तुनख्वा प्रान्तमा रहेको सैन्य पोस्टमा विस्फोटक पदार्थले भरिएको गाडी ठोक्काएपछि ठूलो विस्फोट भएको र त्यसमा १२ सैनिकको मृत्यु भएको अन्तर्राष्ट्रिय सञ्चारमाध्यमले जनाएका छन् ।
बिस्फोटपछि आतंककारीहरुले सैन्य पोस्टमा गोली प्रहार गरेको समेत बताइएको छ । आक्रमणमा सात जना घाइते भएका छन् । हमलापछि पाकिस्तानी सेनाले गरेको जवाफी कारबाहीमा ६ आतंककारी मारिएको बताइएको छ । आक्रमणको इस्लामिक आतंकवादी समूह हाफिज गुल बहादुरले जिम्मेवारी लिएको जनाइएको छ ।
एक दिन अघिमात्र सोही क्षेत्रमा आतंककारी हमलामा ८ सैनिकको मृत्यु भएको थियो । बुधबार मात्रै पाकिस्तानी प्रधानमन्त्री शहबाज सरिफले बलुचिस्तान प्रान्तमा पृथकतावादी विद्रोहीविरुद्ध नयाँ सैन्य कारबाहीको घोषणा गर्नुभएको थियो । उक्त प्रान्त खैबर पख्तुनख्वासँग सीमा जोडिएको र चिनियाँ बेल्ट एन्ड रोड इनिसिएटिभ्स (बीआरआई) को केन्द्र हो ।
