काठमाडौं । इरानसमर्थित लडाकु समूह हिजबुल्लाहले इजरायलविरुद्धको लडाइँ जारी राख्ने जनाएको छ ।
आफ्ना प्रमुख हसन नसरुल्लाह इजरायली आक्रमणमा मारिएपछि पहिलो पटक आयोजित पत्रकार सम्मेलनमा हिजबुल्लाहका उपप्रमुख नइम कासिमीले आफूहरू पुनः संगठित हुने र इजरायलविरुद्धको लडाइ जारी राख्ने बताउनु भएको हो । उहाँले प्रमुखको जिम्मेवारी कसलाई दिने भन्ने निर्णय चाँडै गरिने र आफ्नो समूह नै शक्तिशाली रहने समर्थकहरुलाई आश्वस्त पार्नु भएको छ ।
यो लडाइ लामो हुन सक्ने भएकाले धैर्य रहन पनि उहाँले आह्वान गर्नुभयो ।
यसैबीच इजरायलका रक्षामन्त्री योआभ ग्यालान्टले लेबनानी सीमानजिक रहेको आफ्नो सेनालाई जल, स्थल र हवाई आक्रमणका लागि तयारी गर्न निर्देशन दिनुभएको छ । इजरायली सेनाले एकै पटकमा गाजा, लेबनान र यमनमा आफ्नो आक्रमण जारी राखेको छ।
पछिल्ला हवाई आक्रमणमा लेबनानी समूह हेर्ने हमासका शीर्ष नेतासमेत मारिएका छन् । त्यस्तै गएरातिको हवाई आक्रमणमा एक सय ५ जनाको मृत्यु भएको छ भने तीन सय ५९ जना घाइते भएको लेबनानी स्वास्थ्य अधिकारीलाई उद्धृत गर्दै बीबीसी जनाएको छ ।
इजरायलले हिजबुल्लाहलाई पूर्ण रूपमा ध्वस्त नपारेसम्म आफूहरूले आक्रमण जारी राख्ने बताएको छ ।
