काठमाडौं । श्रीलंकामा आज राष्ट्रपतीय निर्वाचनका लागि मतदान भइरहेको छ । बिहान ७ बजेबाट जारी मतदान बेलुका ४ बजेसम्म चल्ने त्यहाँको निर्वाचन आयोग जानकारी दिएको छ ।
चुनावका लागि १३ हजार ४ सयभन्दा बढी मतदान केन्द्रको व्यवस्था गरिएको छ । २२ निर्वाचन क्षेत्र तय गरिएको यस चुनावमा करिब १ करोड ७० लाख दर्ता मतदाता मतदान गर्न योग्य छन् । चुनावका लागि ३८ उम्मेदवार मैदानमा छन् । निर्वाचनमा वर्तमान राष्ट्रपति रनिल विक्रमासिङ्घे, राष्ट्रिय जनशक्ति गठबन्धनका उम्मेदवार अनुरा कुमार दिशानायके र एसजेबी नेता सजित प्रेमदासाबीच मुख्य प्रतिस्पर्धा छ ।
स्वतन्त्र रूपमा उम्मेदवार बन्नुभएका विक्रमासिङ्घे र प्रमुख विपक्षी नेता प्रेमदासालाई भारत समर्थक मानिएको छ भने चुनावी सर्वेक्षणमा सबैभन्दा बलियो स्थितिमा देखिएका दिशानायके चीन पक्षधर हुनुहुन्छ । भ्रष्टाचारविरुद्ध लड्ने प्रतिबद्धता जनाउँदै उहाँले युवामाझ निकै लोकप्रियता हासिल गर्नुभएको छ ।
श्रीलंकामा सन् २०२२ को आर्थिक संकटपछिको यो पहिलो निर्वाचन हो । संकटका बीच प्रदर्शन चर्किँदा तत्कालीन राष्ट्रपति गोटाबाया राजापाक्षेले देश छाडेपछि रनिल विक्रमासिङ्घे राष्ट्रपति बन्नुभएको थियो । आज भइरहेको निर्वाचनलाई मुलुकमा आर्थिक सुधारका रुपमा हेरिएको छ ।
निर्वाचनको नतिजा आइतबार सार्वजनिक हुने बताइएको छ ।