काठमाडौं । भारतीय प्रहरीले दक्षिणी भारतमा रहेको सामसुङ इलेक्ट्रोनिक्स प्लान्टका कामदारहरुले अनुमतिविनै पुनः प्रदर्शन र हड्ताल गर्न योजना बनाएको आरोपमा एक सय चार जनालाई पक्राउ गरेको छ ।
त्यहाँको स्थानीय प्रहरी अधिकारीले आज सामसुङ इलेक्ट्रोनिक्स प्लान्टका एक सय चार जनालाई पक्राउ गरेको पुष्टि गरेको अन्तर्राष्ट्रिय सञ्चारमाध्यमले जनाएका छन् । त्यस क्षेत्रमा स्कुल, कलेज र अस्पतालहरू भएकाले अनुमति नदिएपनि कामदारहरुले जबरजस्ती प्रदर्शन गर्ने योजना बनाएको कारण उनीहरुलाई हिरासतमा लिइएको कञ्चीपुरम जिल्लाका वरिष्ठ प्रहरी अधिकारी के शन्मुगमले बताउनुभएको रोयटर्सले जनाएको छ ।
प्रहरीले कामदारलाई हिरासतमा लिएपछि तमिलनाडु राज्यको चेन्नई शहर नजिकैको सामसुङ गृह उपकरण प्लान्टमा पुनः कामदारहरूले गरेको हडताललाई निरन्तरता दिएको बताइएको छ ।
विगत सात दिनदेखि सामसुङ इलेक्ट्रोनिक्स प्लान्टका कामदारहरुले उच्च ज्यालाको माग गर्दै प्रदर्शन र हड्ताल गरिरहेका छन् । हड्तालका कारण कम्पनीको उत्पादनमा अवरोध भइरहेको कम्पनीको गुनासो छ । सामसुङको वार्षिक १२ अर्ब डलरको भारतको राजस्वको झन्डै एक तिहाइ योगदान भने गरिरहेको बताइएको छ ।
सामसुङ बाहिरी श्रमिक समूहद्वारा समर्थित कुनै युनियनलाई मान्यता दिन इच्छुक नरहेको बताइएको छ । सामसुङले गत शुक्रबार चेन्नई प्लान्टमा आफ्ना कामदारहरूसँग सबै समस्याहरू चाँडै समाधान गर्न छलफल सुरु गरेपनि कुनै निश्कर्ष भने ननिस्किएको बताइएको छ ।
