काठमाडौं । एन्फा महिला लिगमा सुदूरपश्चिमले लगातार छैठौं हार ब्यहोरेको छ। एन्फा कम्प्लेक्समा आज भएको खेलमा कर्णाली प्रदेशले सुदूरपश्चिमलाई ३-० ले हराएको हो ।
खेलको २४ औं मिनेटमा कर्णालीले अग्रता बनायो। गरिमा राईले मिलाइदिएको पासमा भूमीका बुढाथोकीले बक्सभित्रबाट गोल गरेपछि पहिलो हाफमा कर्णाली १-० ले अघि रह्यो ।
दोस्रो हाफमा सुदूरले दुई गोल ब्यहोर्यो। खेलको ६२ औं मिनेटमा गरीमाले गोल गरिन्। त्यसैगरी ६४ औं मिनेटमा वर्षा ओलीले कर्णालीलाई ३-० गोलको अग्रतामा पुर्याएकी थिइन्।
खेलमा सुदूरपश्चिमले केही अवसर बनाए पनि त्यसलाई सफल प्रयोग गर्न सकेन। आजको जितसँगै कर्णालीले ६ खेलमा चार अंक जोडेको छ। जारी लिगमा कर्णालीको यो पहिलो जितसमेत हो । कर्णाली तालिकाको पुछारबाट दोस्रो स्थानमा छ। पराजित सुदूर पुछारमा छ। महिला लिगअन्तर्गत भोलि दिउँसो तीन बजे हुने खेलमा बागमती युवा क्लबले वालिङ नगरपालिकाको सामना गर्नेछ।
