काठमाडौं । अमेरिकाको फ्लोरिडास्थित वेस्ट पाम बिचमा पूर्वराष्ट्रपति डनल्ड ट्रम्पमाथि एके-फोर्टी सेभेन बन्दूकले आक्रमण गर्न खोजेको आरोपमा पक्राउ परेका व्यक्ति युक्रेन समर्थक रहेको खुलेको छ ।
आइतबार फ्लोरिडास्थित अन्तर्राष्ट्रिय गल्फ कोर्समा गल्फ खेलिरहेका ट्रम्पलाई गोली प्रहार गरी हत्या गर्ने प्रयास गरेको आरोपमा संघीय जाँच एजेन्सी-एफबीआइले ५८ वर्षीय रायन वेस्ले रोथ नामक व्यक्तिलाई पक्राउ गरेको थियो ।
रुस-युक्रेन युद्धमा उनको पूर्ण सहानुभूति युक्रेनप्रति रहेको एफबीआईलाई उद्धृत गर्दै द न्युयोर्क टाइम्सले जनाएको छ। रोथले युक्रेनमा युद्ध लड्ने इच्छासमेत व्यक्त गरेका छन् । उनीसँग कुनै सैन्य अनुभव नभए पनि रुसी आक्रमणपछि उनी युक्रेन गएको समाचारमा जनाइएको छ । उनले रुसविरुद्ध लड्न युक्रेनी सेनामा अफगान सैनिक भर्ती गर्न चाहेको समेत बताएका छन् ।
ट्रम्प गल्फ खेलिरहेका बेला नजिकैको एक झाडीबाट एउटा राइफलको नाल बाहिर निस्केको देखेपछि एफबीआइ एजेन्टले गोली प्रहार गरेका थिए । त्यसपछि भाग्ने क्रममा रोथ पक्राउ परेका थिए । पक्राउपछि प्रहरीले उनको विगतमाथि अनुसन्धान थालेको बीबीसीले जनाएको छ ।
दुई महिनाअघि पनि ट्रम्पमाथि पेन्सिलभेनियामा आयोजित एक र्यालीको क्रममा गोली प्रहार भएको थियो । तर, प्रहार गरिएको गोली ट्रम्पको कान छोएर गएको थियो । त्यसबेला उहाँ भाग्यवश बाँच्न सफल हुनु भएको थियो।