काठमाडौं । बंगलादेशको अन्तरिम सरकारले शेख हसिना सरकारका आठ मन्त्री र अवामी लिगका छ सांसदलाई देश छाड्न प्रतिबन्ध लगाएको छ ।
सरकारले पूर्वमन्त्रीहरू जाहिद मलिक, दिपु मोनी, मोहिबुल हसन चौधरी नौफेल, साधनचन्द्र मजुमदार, नुरुल मजिद महमूद हुमायुँ, कमल अहमद मजुमदार, शाहजहान खान र कमरुल इस्लामलाई प्रतिबन्ध लगाएको हो ।
त्यस्तै सलीम उद्दीन, मामुनुर रसिद किरण, कुजेन्द्रलाल त्रिपुरा, काजिम उद्दिन, नूर आलम चौधरी र जियाउर रहमान गरी ६ सांसदलाई देश छाड्न प्रतिबन्ध लगाइएको छ। त्यस्तै, अदालतले शेख हसिना सरकारमा वाणिज्यमन्त्री रहेका टिपु मुन्सीलाई चार दिन हिरासतमा राख्न अनुमति दिएको छ ।
राजधानीको बड्डा प्रहरी चौकीमा सुमन सिकदार नामका व्यक्तिको हत्या गरेको अभियोगमा मुन्सीलाई हिरासतमा राखिएको जनाइएको छ । यसैबीच, भारतीय विदेश मन्त्रालयले बंगलादेशको पछिल्लो परिस्थतिका कारण त्यहाँ चलिरहेका भारतीय परियोजना स्थगन गरिएको जनाएको छ। प्रवक्ता रणधीर जैसवालले बंगलादेशका परियोजनाबाट केही व्यक्ति फिर्ता आउनुपरेका कारण ती आयोजना रोकिएको बताउनुभएको हो ।