काठमाडौं । पेरिस ओलम्पिक २०२४ मा इजरायलको सहभागिताको विरोधमा पेरिसको प्लेस डे क्लिचीमा प्रदर्शन भएको छ ।
गाजामा इजरायलले युद्ध अपराध गरेको भन्दै ओलम्पिकमा इजरायलको सहभागिता रोक्नुपर्ने मागसहित प्रदर्शन गरिएको हो । केही प्रदर्शनकारीहरु स्पेनबाट आएका थिए । उनीहरुले रुसजस्तै इजरायली प्रतिनिधिमण्डललाई पनि ओलम्पिकबाट निष्काशित गर्न माग गरेका छन् । यस पटक रुसका एथ्लिटहरू तटस्थ खेलाडीका रुपमा अन्तर्राष्ट्रिय ओलम्पिक कमिटीको झण्डामुनि ओलम्पिकमा सहभागिता जनाउँदै छन् । उनीहरुलाई रुसको झण्डा, राष्ट्रिय गान र अन्य कुनै प्रतीकहरू प्रयोग गर्न प्रतिबन्ध छ ।
फ्रान्सेली सेनाले खेलहरूको सुरक्षाका लागि धेरै देशसँग सहकार्य गरेको छ भने पेरिसमा रहँदा इजरायली खेलाडीहरूलाई चौबीसै घण्टा सुरक्षा दिइनेछ ।
युक्रेन र गाजामा जारी युद्धलाई लिएर चर्को सुरक्षा चिन्ता बढेको भूराजनीतिक तनावबीच ३३औं संस्करणको ग्रिस्मकालीन ओलम्पिक शुक्रबारबाट औपचारिक रुपमा सुरु हुँदैछ ।
