काठमाडौं । बंगलादेशको एक विशेष अदालतले पूर्वप्रधानमन्त्री शेख हसिनाविरुद्ध पक्राउ पुर्जी जारी गरेको छ ।
शेख हसिनालाई गत जुलाई-अगस्टमा देशमा भएका अपराधमा संलग्न भएको आरोपमा पक्राउ पुर्जी जारी गरिएको जनाइएको छ । अदालतका अध्यक्ष मोहम्मद गुलाम मुर्तजाको इजलासले आज यस्तो आदेश दिएको हो । प्रमुख सरकारी वकिल ताजुल इस्लामले पत्रकार सम्मेलन गरी शेख हसिनाविरुद्ध पक्राउ पुर्जी जारी गरिएको जानकारी दिनुभएको हो ।
इन्टरनेसनल क्रिमिनल ट्रिब्युनल–आईसीटीले शेख हसिना र ओबैदुल कादरसहित ४६ जनाविरुद्ध दुई छुट्टा-छुट्टै उजुरीको सन्दर्भमा पक्राउ पुर्जी जारी गरेको अन्तर्राष्ट्रिय सञ्चारमाध्यमले जनाएका छन् । हसिनालाई नोभेम्बर १८ अघि अदालतमा उपस्थित हुन आदेश दिइएको बताइएको छ ।
आईसीटीले एउटा मुद्दामा शेख हसिनालाई पक्राउ गर्न वारेन्ट जारी गरेको छ भने अर्को मुद्दामा अवामी लिगका महासचिव ओबैदुल कादरसहित ४५ जनाविरुद्ध पक्राउ पुर्जी जारी गरेको बताइएको छ । जसमा लेखक तथा शिक्षाविद् जफर इकबाल र पूर्व न्यायाधीश शमसुद्दीन चौधरी माणिक पनि छन् ।
सरकारी जागिरमा कोटाको विषयमा देशव्यापी रुपमा चर्किएको विद्यार्थी आन्दोलनका क्रममा सात सय जनाको मृत्यु भएको थियो भने हजारौँको संख्यामा घाइते भएका थिए । सोही आन्दोलनका कारण गत अगस्ट ५ मा शेख हसिना प्रधानमन्त्री पदबाट राजीनामा दिएर भारत पलायन हुनु भएको थियो।
त्यसयता उहाँ भारतमा बस्दै आउनुभएको छ । अन्तर्राष्ट्रिय फौजदारी न्यायाधीकरणले सन् १९७१ को मुक्तियुद्धमा भएको मानवीय अपराधसम्बन्धी मुद्दाको पनि सुनुवाइ गरेको थियो।