बाँके । बाँकेमा बालबालिकामा कुपोषणको समस्या गम्भीर देखिएको छ।
पाँच स्थानीय तहमा छ महिनादेखि ५९ महिनासम्मका बालबालिकामा गरिएको स्क्रिनिङ्गबाट २ सय ३३ जना बालबालिकामा कडा कुपोषण फेला परेको हो । स्वास्थ्य कार्यालय बाँकेले पाँच स्थानीय तहमा गरेको स्क्रिनिङ्गमा २१ हजार ५ सय ४९ बालबालिकामध्ये २ सय ३३ जनामा कडा कुपोषण देखिएको छ।
राप्तीसोनारीमा ३१, बैजनाथमा ४४, खजुरामा ३२, जानकीमा ३६ र डुडुवामा सबैभन्दा बढी ९० जना बालबालिका कुपोषित भेटिएका छन्। त्यस्तै नरैनापुर गाउँपालिका, कोहलपुर नगरपालिका, र नेपालगञ्ज उपमहानगरपालिका क्षेत्रमा स्क्रिनिङ्ग अभियान विस्तार गरिने जनाइएको छ।
मध्यम कुपोषणको अवस्था झनै चिन्ताजनक छ। पाँच पालिकामा १ हजार १ सय ५ बालबालिकाहरू मध्यम कुपोषणबाट प्रभावित रहेका छन्। तथ्यांकअनुसार बाँकेमा कुपोषण बढ्दो क्रममा छ। आर्थिक वर्ष २०८०/८१ मा ४ सय ४२ र २०८१/८२ मा ५ सय ५८ बालबालिकामा कडा कुपोषण देखिएको थियो ।
समग्रमा चालु आर्थिक वर्षको आठ महिनामै ३ सय २८ बालबालिकामा कडा कुपोषण भेटिइसकेको छ। कुपोषणको समस्या न्यूनीकरणका लागि समुदायस्तरमै सचेतना आवश्यक रहेको सरोकारवालाले बताएका छन्।
.png&w=350&height=150)
