महोत्तरी । महोत्तरीको जलेश्वरस्थित प्रादेशिक अस्पतालमा बढ्दो बेथिति, अनियमितता र अस्तपालले प्रवाह गर्ने न्यूनतम स्वास्थ सेवासमेत गुणस्तरीय नभएको भन्दै जेन-जी युवाहरूले विरोध गर्न थालेका छन् ।
अस्पतालमा औषधि अभावदेखि खरिद गरिएका स्वास्थ उपकरणहरू सञ्चालन नहुँदा उपचारमा समस्या भइरहेको युवाहरूमा जेन-जीहरूले असन्तुष्टि जनाएका हुन् । सरकारले निःशुल्क उपलब्ध गराएका ९८ प्रकारका औषधिसमेत महिनाैदेखि अभाव हुँदा बिरामी मर्कामा पर्ने गरेका छन् । अस्पतालमा दैनिक तीन सयजना भन्दा बढी बिरामी आउने गरेता पनि अस्पताल व्यस्थापनमा सुधार नभएको उनीहरूको आरोप छ ।
प्रादेशिक अस्पताल जलेश्वरमा कर्मचारी नियुक्तिमा अनियमितता, अस्पतालको इमरजेन्सी र मेटर-निटी वार्डमा डाक्टर अनकुलमा राखिनु, अस्पतालमा सरसफाइलगायत अस्पताल सञ्चालन तथा व्यस्थापन समिति अध्यक्षले लापरबाही गरी रहेको युवाहरूले गुनासो गरेका छन् ।
यसैबीच प्रादेशिक अस्पताल जलेश्वरमा कर्मचारी नियुक्तिमा अनियमितता, प्रमाणपत्र नभएको व्यक्तिलाईसमेत नियुक्ति गरिएको प्रादेशिक अस्पताल जलेश्वरका मेडिकल सुपरिटेन्डेन्ट डाक्टर विकासकुमार साहले नै स्वीकार गर्नुभएको छ । डाक्टर साहले आफू आउनु अघि कै कर्मचारीहरू रहेको स्वीकार्दै ती कर्मचारीले कामसमेत सिक्दै गरेको र सहयोगीको रूपमा रेडियोग्राफर भएको बेलामामात्रै काम गर्ने गरेको भन्दै बचाउ गर्नुभयो ।
जलेश्वर प्रादेशिक अस्पताललाई प्रदेश सरकारले २०७६ चैत २७ गते १५ शैय्याबाट ५० शैय्याको घोषणा गरे पनि सञ्चालन हुनसकेको थिएन । सरकारले फेरि सोही अस्पताललाई २०८० साल असारमा एक सय शैय्याको अस्पताल बनाउने घोषणा गर्यो । अस्पतालमा राज्यले करोडौँ लगानी गरे पनि व्यवस्थापनमा ध्यान दिन नसकेकाले बिरामीले गुणस्तरीय सेवा पाउन सकेका छैनन् ।
