काठमाडौं । ७२औं राष्ट्रिय क्षयरोग नियन्त्रण दिवस 'हामी सबैको प्रतिबद्धता क्षयरोगको नियन्त्रणमा सफलता' भन्ने मूल नाराका साथ विभिन्न कार्यक्रम गरी मनाइएको छ ।
दिवसका अवसरमा क्षयरोग निवारण संघ मोरङले क्षयरोगीहरूलाई पौष्टिक आहार तथा फलफूललगायतका सामान वितरण गरेको छ । मोरङमा क्षयरोगीहरूको संख्या प्रत्येक वर्ष बढ्दै गएको तथ्याङ्कले देखाएको छ । मोरङमा आर्थिक वर्ष २०८०/८१ मा एक हजार दुई सय ४५ जना क्षयरोगी फेला परेका थिए भने आर्थिक वर्ष २०८१/०८२ मा एक हजार तीन सय ३५ जना नयाँ क्षयरोगीहरू फेला परेका छन् ।
यस्तै यो आर्थिक वर्षको साउन महिनादेखि अहिलेसम्ममा तीनसय ८५ जना नयाँ क्षयरोगी फेला परेको स्वास्थ्य कार्यालय मोरङका प्रमुख मुलुकचन्द राजवंशीले बताउनु भयो । पहाडका जिल्लाहरूमा भन्दा तराईका जिल्लाहरूमा क्षयरोगीको संख्या बढेर गएको पाइएको छ । समयमै अस्पताल गएर नियमितरूपमा औषधि सेवन गरे क्षयरोग पूर्णरूपमा निको हुने चिकित्सकहरूको भनाइ छ ।
तर नेपालमा क्षयरोगीको पहिचानमा कठिनाइ हुँदा रोग निवारणमा समस्या भएको सरोकारवालाहरूले बताएका छन् । क्षयरोग आँखाले नदेखिने माइक्रो ब्याक्टेरियम भन्ने सुक्ष्म किटाणुबाट लाग्ने सरूवा रोग हो । एक जना फोक्साका क्षयरोगीले उपचार नलिएमा एक वर्षमा १० देखि १५ जना सम्मलाई क्षयरोग सर्न सक्छ ।
प्रत्येक वर्ष नेपालमा क्षय रोगीको संख्या बढ्दो क्रममा छ । नेपालमा प्रत्येक वर्ष ४० हजार क्षयरोगीहरू थपिने गरेको तथ्यांक छ । नेपालमा प्रत्येक बर्ष पाँच हजारदेखि सात हजार मानिसहरू क्षयरोगको कारण मर्ने गरेका छन् ।
